नेपाली हास्यव्यङ्ग्य अनलाइन पत्रिका

नवराज कार्की :

एक
एउटा सुतेको हात्तीको माथि पुग्यो कमिलो
हात्ती उठ्यो र तन्कियो झन् माथि पुग्यो कमिलो
उसले ठान्यो कि- “हात्ती भन्दा त ठूलो भएँ म ”
हात्ती लम्कियो र सिँ गर्यो,माथि पुग्यो कमिलो ।

दुई
अमेरिकी अमेरिकामै बस्छन्, जापानी जापानमै बस्छन्
नेपाली छन् भाग्यमानी जो, संसारभर बस्छन्
लक्ष्य अनुसार,गच्छे अनुसार,देश रोजेर जान्छन्
घरमा जो जो बस्छन् ती पनि, निहुँ खोजेर बस्छन् ।

तीन
छैन, हुँदैन, सकिदैन, कोही यसरी शुरू हुन्छन्
छ,हुन्छ, सकिन्छ, कोही यसरी शुरू हुन्छन्
जसरी थालिन्छ नि काम, त्यसरी नै अन्त्य हुन्छ
जो जो पुग्छन् नि लक्ष्यमा, तिनै गुरू हुन्छन् ।

चार
काला-काला आँखाले हानेपनि नीलडाम देखिदैन
खैरा,नीला आँखाले हानेपनि, नीलडाम देखिदैन
कहाँ कहाँ कति मिलाएर हान्दारै’छन् ती आँखाले
घाईतेहरू ठहरै हुन्छन् तर, नीलडाम देखिदैन ।

०००
अमेरिका