नेपाली हास्यव्यङ्ग्य अनलाइन पत्रिका

डा. खगेन्द्रप्रसाद दाहाल :

मान्छेका मति भिन्न छन् किसिमका छन् सोचमा भिन्नता
सोझो गर्छु भन्यो घुमाउन यहाँ छन् आसुरी मान्यता
चक्रै चक्र कुचक्र तोड्न सजिलो भेट्दैन सोझो मन
सोझो मार्ग घुमाउरो छ जहिल्यै गाह्रो छ नेता हुन ॥

यस्तो लाग्दछ राज्यतन्त्र अहिले हो यन्त्र थोत्रो तर
बोकेको छ रिमोट दूर कसले सन्देह छन् डङ्गुर
जालीका बिचमा छ साधु जहिल्यै काट्दै सयौँ बन्धन
छिर्के छल्न सकिन्न लड्छ बबुरो गाह्रो छ नेता हुन ॥

बोलीकै भर छैन काम छ अरू बोल्नै पर्‍यो बोल्न ता
के बोल्दा कसलाई छुन्छ कसरी बोल्दै छ छन् बाध्यता
बोलीको अनुरूप को छ र यहाँ घस्नै पर्‍यो चन्दन
आगोमाथि बसेर बोल्नु कसरी गाह्रो छ नेता हुन ॥

नेता जागिर हैन भन्छ दुनियाँ छन् बालबच्चा घर
पैसाकै त रहेछ खेल जसको टाढा बसी हुन्छ र !
सेवा देश विकासको छ पगरी तान्ने छ चर्को धन
यस्तो सङ्गतभित्रको छ दुनियाँ गाह्रो छ नेता हुन ॥

जो आरोपित हुन्छ तान्छ लहरो ब्रह्माण्ड हल्लाउँछ
बाठो मूल परै बसेर तलका खैँचेर डल्ल्याउँछ
किन्दै बेच्छ इमान रात दिन हो भन्छन् छ हेर्दै मन
यस्तो राज सँभाल्न छैन सजिलो गाह्रो छ नेता हुन ॥

०००
झापा, हाल अमेरिका