नेपाली हास्यव्यङ्ग्य अनलाइन पत्रिका

डा. खगेन्द्रप्रसाद दाहाल :

चप्प चप्प छ सुरासँग साथ
टाउकोसँग म जोड्दछु हात
शुद्ध बोल्छु मुखले गुलियो छु
कुर्सीमा छु म यसै बलियो छु ॥

दृष्टि चञ्चल घुमाउँछु फेरि
खान्छु झ्वाम्म मुखको म नहेरी
आडमा छु दलको जहिल्यै म
देखिइन्न यसमा कहिल्यै म ॥

गाउँ घुम्छु मुखले रस छर्छु
भोटखातिर म नाटक गर्छु
तर्कमा म छु सरासर माथि
माथि पुग्दछु कमाउँछु साथी ॥

छैन कानुन सशक्त ममाथि
छर्छु थोर यसमा धन साथी
खर्च गर्न छ सदा सरकारी
राख्छु ठिक्क सँगमा अधिकारी ॥

विश्वको भ्रमण गर्छु यसै म
दुख्नु हुन्न शिर पुग्छु उतै म
राज्यको विपुल कोष छँदै छ
सामदानसँग शक्ति छँदै छ ॥

भित्र भैकन म बाहिर हुन्न
कस्न खोज जति नै म कसिन्न
हान वाण जति नै म खडा छु
चिन्न सक्छ कसले म कडा छु ॥

०००
झापा, हाल अमेरिका