नेपाली हास्यव्यङ्ग्य अनलाइन पत्रिका

खगेन्द्र नेउपाने :

यो शान्ति निरपेक्ष होइन
कसैले हतियारमा साँध लाउँदै रहेछ
वषौँंदेखि बाँचेको सामाजिक सौहार्द्रतालाई बिथोल्न
समुन्द्र पारिबाट कोही आउँदै रहेछ ।

अस्पतालमा रगत साटासाट गरेका हामी
चाडबाडमा प्रेम बाँटाबाँट गरेका हामीहरू
एउटै अँगालोमा कसिएको देखेर
अँध्यारो कुनाबाट कोही
एक अर्कालाई उक्साउँदै रहेछ
एउटै मेलामा पर्म साटेका हामीहरु
एउटै दाम्लोमा पोया बाटेका हामीहरू
एउटै लैबरीमा लहसिएको देखेर
फुटको अस्त्र बनाउँदै रहेछ
वर्षौँदेखि बाँचेको सामाजिक सौहार्द्रतालाई बिथोल्न
समुन्द्र पारिबाट कोही आउँदै रहेछ ।

कसिलो प्रेम बनाइ राखे
निर्लज्ज बन्नेछन् दुस्मतियारहरू
हामी आफू बलियो बने
कमजोर पर्ने छन् तिनका हतियारहरू
राजनैतिक प्रतिष्ठाभन्दा परको जिन्दगी
हाम्रो एउटै नशामा बगेको छ
धर्मले अलग्याउन नखोज
एउटै घरभित्र गुम्बा मन्दिर र मस्जिद बनेको छ
तर पनि
पचासौँ वर्षदेखि यो एकतालाई तोड्न
विभिन्न रुपमा धाउँदै रहेछ
वर्षौँदेखि बाँचेको सामाजिक सौहार्द्रतालाई बिथोल्न
समुन्द्र पारिबाट कोही आउँदै रहेछ ।

०००
गौरादह, झापा