नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

छल्ने ढाँट्ने भ्रष्टका पाउ पर्ने ।
आँखा छल्ने कामको नाम छल्ने ।
जस्तो हामी हुन्छ नेतृत्व उस्तै ।
माछो माछो भ्यागुतो पार्न जान्ने ॥

यौटा पाटो चैनको जिन्दगीमा ।
अर्को भोको गन्दगी गन्दगीमा
हाम्रा नेता चोरको साथ माग्ने ।
माछो माछो भ्यागुतो पार्न जान्ने ॥

साँचो बोली बन्धकी बस्छ आज ।
दोस्ती हुन्छन् चील या बाजमाझ ।
नेता हाम्रा देखिए भोट तान्ने ।
माछो माछो भ्यागुतो पार्न जान्ने ॥

ताली ठोक्ने साथमा बुद्धिजीवी ।
पैसावाला खोज्दछन् मात्र डी बी ।
रैती उस्तै भोटमा मासु खोज्ने ।
माछो माछो भ्यागुतो मात्र रोज्ने ॥

वैरी आई छेउमा जाल हान्छ ।
ठूलो माछा अल्झिँदै भित्र जान्छ ।
नेपालीको साथमा छैन भिड्ने ।
माछो माछो भ्यागुतो मात्र रोज्ने ॥

हुण्डी गर्दै निख्रियो देश रित्तो ।
हाम्रो बोली सुन्दिने मात्र भित्तो ।
गोर्खालीको बुद्धि फिर्दै नफिर्ने ।
माछो माछो भ्यागुतो मात्र रोज्ने ॥

गुन्डा डन्डा भोटमा चाहिहाल्यो ।
सत्ता भत्ता राज्यको पाइहाल्यो ।
नेता जस्तो देखिँदा दाम जोहो ।
माछो माछो भ्यागुतो बँच्छ लोहो ॥

०००
खोटाङ