नेपाली हास्यव्यङ्ग्य अनलाइन पत्रिका

तुलसीप्रसाद भट्टराई :

नेता भ्रष्ट भएर देश लुटियो वैरीहरू लम्किए
हत्यारा पनि जेल मुक्त बनिए गुण्डाहरू चम्किए
कानूनी अवधारणा मुलुकको धज्जी उडे झैँ भयो
हाम्रो न्याय तराजु बेचिन गए अस्तित्व केमा रह्यो ।

दुःखीका घर झोपडी पनि जले बस्ती कटेरा भए
सत्ता भित्र छिरे पछाडि किन हो नेता खटेरा भए
काण्डैकाण्ड भएर देस भरको सम्यन्त्र ध्वस्तै गरे
मन्त्री मेच घुमाउँदै सदनमा आनन्दले बस्छरे ।

बाडीले जनता पुगे बगरमा देख्दैन सत्ता किन
नेता दैनिकपुग्छ त्यो सदनमा फर्छ्यौट भत्ता लिन
छाप्दैछन् अखबार दैनिक कुरा नारी बलात्कारका
केही हुन्न सजाय मात्र हनुमान् भए चमत्कारका ।

भोकै छन् जनता परे कहरमा सन्त्रास सन्त्रास छ
केही निणर्य हुन्छ त्यो सदनमा भन्ने ठूलो आश छ
राम्रो दर्शन मार्क्स चिन्तन लिने नेतृत्वको शासन
लाजै मर्नु गरे दलाल बनिए लूटे सबै रासन ।

ठेक्काको निहुँमा धमाधम सबै नाफा मुनाफाहरू
बाँड्दै खान सिकेर आज अगुवा यी भ्रष्ट नेताहरू
नेपाली पन बिर्सिएर यसरी जाली भएका किन
डाकाको अवतार धारण गरे सत्ता पुगेको दिन ।

सत्ताको मद मानले चयनले बिर्से हिजोका कुरा
सेनाको प्रहरी जवान हुलको लिन्छन् सुरक्षा पुरा
नेता हो जनवादको यदि भने यत्रो सुरक्षा किन
अर्को भोट हुँदा बखान गरने नारा कुनै देख्दिनँ ।

०००
बिर्तामोड -५, झापा