नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

कुरौटे भरौटे भोका बसाहा
छ टोले र झोले नाता अथाह
धराधाम बेच्दै पारिन्छ स्वाहा
चलाऔं सुनामी खेदौं फटाहा ।१

पराया दलाली खोज्छन् समाहा
उचाल्ने थचार्ने गर्छन् ठिमाहा
अवस्था छ उस्तै नेता भुस्याहा
कठालो समात्दै खेदौँ फटाहा ।२

कुसंस्कारधारी गुण्डा ठगाहा
उसैका गुलामी धन्धा मिचाहा
कसैका मलामी लुच्चा सुताहा
उचालेर लाठो खेदौँ फटाहा ।३

लुटेरा हरामी सत्ता छ डाह
बजाएर बाजा घण्टा दमाहा
रुवाएर आमा खान्छन् पटाहा
जलाएर राँको खेदौँ फटाहा ।४

धपाए युवा यी पाखा ढवाहा
बनी धुन्धुकारी बोल्दैछ हा हा
बिरानो छ बारी खन्दैन चाहा
बनाएर नाङ्गो खेदौँ फटाहा ।५

हली पाङ्दुरे यी कस्का भदाहा
छ हत्या र हिंसा बानी पिराहा
सिध्धान्त राम्रो जाली मताहा
भदौरे खोला झैँ खेदौँ फटाहा ।६
०००
नवलपुर