नेपाली हास्यव्यङ्ग्य अनलाइन पत्रिका

उत्तम विचार :

गरूँ चाकरीले चिनारी बदल्छ
विनाचाकरीले कहाँ देश चल्छ ।
चढाएर भेटी खुसी राख्न पाऊँ
सधैँ मिल्छ आशिष् म द्यौता जगाऊँ ।।१।

कहाँ हुन्छ पूजा विनाफूलपाती
जहाँ हुन्न नैवेद्य बल्दैन बाती ।
सधैँ भोग खाने चिनी देवदेवी
बनूँ भक्त आफैँ बनूँ नित्य सेवी ।।२।

कतै हुन्न राम्राहरूको बखान
सधैहुन्छ हाम्राहरूको बखान ।
भए भ्रष्ट जाली फटाहा निकम्मा
तिनैको छ चर्चा नमानौँ अचम्म ।।३।

नुहाई गधा हुन्न गाई कदापि
म चोखो भनी भ्रष्ट डुल्छन् तथापि ।
नमस्कार खाए पचाए सलामी
सधैँ चाकरीमैं भयौँ व्यस्त हामी ।।४।

हुँ चम्चा बिगार्ने भजाएर नाउँ
अरू भोकमा छन् म नैं भन्छ खाऊँ ।
लुटेराहरूको गरूँ चाकरी म
तिनैको हुँ सेवी गरूँ नोकरी म ।।५।

०००