नेपाली हास्यव्यङ्ग्य अनलाइन पत्रिका

हरिप्रसाद पौड्याल :

सारङ्गीको मिठो धून, सुनिँदैन यता कतै
विदेशी बज्दछन् बाजा, घर- गाउँ जताततै ॥१

पुराना बिर्सियौँ खाना, ढिँडो, रोटो र बाबर
पिजा बर्गर रोज्दै छौँ, भई स्वादे र पामर ॥२

कला – संस्कृतिको रक्षा, भए पो हुन्छ गौरव
भाषा- साहित्य हुन् प्राण, बचाए चल्छ सौरभ ॥३

धोती टोपी लडाइन्छन्, तेरो मेरो भनी यहाँ ॥
चौबन्दी, फरिया अश्रु, झार्छन् बन्धक भै जहाँ ॥४

सुरुवाल र दौराको घट्यो मूल्य उसै गरी
पहिचान गुमाएर बाँच्ने हो भन के गरी ? ॥५

एउटै फूलबारीका, करोडौँ फूल हौँ तर
कामचोर हुँदा माली, सकेनौँ फुल्न सुन्दर ॥६

सभ्यता-मान्यता हाम्रा, मुर्झाए मर्न तत्पर
बलिया इँट, खम्बा यी, जोगाए बन्छ यो घर ॥७

०००
धुलाबारी, झापा