नेपाली हास्यव्यङ्ग्य अनलाइन पत्रिका

कलानिधि दाहाल :

उलट्पलट्मा
पलट्उलट्मा
छलाङ् मार्न खोज्नेहरू
मार्न खोजेका छलाङ्हरू
छेपारो रङ्का
हुनसक्छन् प्रधानमन्त्री पनि
राष्ट्रपति पनि
नेताकार्यकर्ता अझ बढी
जसको
न हिजो थियो
न हुने छ भोलि
पर्सिको त कुरै नगरौँ
आज नै हराइसकेका छन्
वनमारा माथिमाथि
दौड फड्केर
घारी पसेका छेपाराझैँ
अहिले
एकछिन्
सिँगौरी त
घाँसमाथि लडीबुडी
मडारिएको भैंसी पनि खेल्छ
दिलदिमाखको डिलमा बसेर
मस्रिणमिही रेखाधार हिँड्न त
धैर्यको धावक चाहिन्छ
संयमको साहस चाहिन्छ
स्यालपछि लागेको मृगझैँ
मनको चितुवाले
चिथोर्न लागेको मनझैँ
पाइलाविहीन पाइलाहरू
धैर्यविहीन धावकहरू
कुन् बेला
कता चिप्लन्छन्
अरू त अरू
उनीहरू स्वयंलाई थाहा छ
न हिजो थिएँ
न भोलि हुन्छु
बिचरा छेपाराहरू
पल्भर कुद्दै छन्
वनमारामाथि
चिप्लो गोरेटोमाथि
छङ्गाछुर भीरको छेउमा
घाँस चर्दै गरेको गोरुझैँ
फर्केपछि
न उसको
पदचाप बाँकी रहन्छ
न उसको
तनको छाप बाँकी रहन्छ
निर्वाध आफैँमा
सुतेको पाखो छँदै छ
निर्द्वन्द्व आफैँमा
अग्लेको पहाड
उचाइ थपिरहन्छ
यी ढिस्काहरू
कमिलाका ताँतीले
एकछिन् छातीमा बोकेको
माटो न हुन्
प्रयासको लामो प्रहरमा
तर्सेर बने
झस्केर भत्कन्छन्
पल्भर डायनोसर त
बरु इतिहासमा
खोजको थेसिस उभिन्छन्
तर छेपाराका क्षणिक
रङ्ग लामहरू
वनमाराका शिर कुदेर
पानीका फोका झैँ
माटोका ढिस्का झैँ
चैतको डढेलो सल्किसकेका छन्
न अतीत
न भविष्य
वर्तमानका
एकडङ्गुर छेपारा
देख्नै नपाइने
सुरुङ् छिर्दै छन्
जमात जम्मा भएर
धैर्यहीन छेपाराहरू
विचारहीन बेचाराहरू !!

०००
कलेकुटी, काठमाडाैं