नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

बाबा आमा छिमेकी वृद्ध वृद्धा छहारी
काका काकी धनी छन् गर्न थाले जुहारी
खाने के हो र आमा भन्न थालिन् किशोरी
आधामाना छ पीठो छाक टारौँ कसोरी ।१

गाईभैँसी र बाख्रा हेर्न जाने बुहारी
डाँडापाखा पखेरा कन्दरामा चहारी
पाडाबाच्छा बकेर्ना गोठमा छन् हजारी
आधामाना मकैले भोक टारौँ कसोरी ।२

पैसावाला यताका खोज्न हिँड्छन् कमारी
होला कस्तो कसैको भाग्य रेखा र नारी
आफ्नो यस्तो अवस्था देख्छ कोही पुजारी
आधामाना छ पीठो छाक टारौँ कसोरी ।३

डाँडाभाटा र छाना खस्ने लाग्छन् तयारी
भित्ता गाह्रा भिराला बन्न थाले भकारी
लिप्ने टाल्ने गरे पो खन्न माटो छ बारी
आधामाना छ पीठो छाक टारौँ कसोरी ।४

पैह्रो आयो करेसा पुर्न थालेछ भारी
माटो थुप्रो परेको को छ फाल्ने उधारी
बाँझो बस्दा फुलेको झार बोके छ घारी
आधामाना छ पीठो छाक टारौँ कसोरी ।५

लालाबाला रुँदैछन् काम मिल्दैन कोरी
टारी बारी बनेली लाज मान्दैछ छोरी
पाटोबारी पहेंलो फुल्न थालेछ तोरी
प्यारा सन्तानको खै भोक टार्ने कसोरी ।६

०००
नवलपरासी