कालो सर्प
यो वाचा सबले गरी मनमनै उठ्ने जमर्को गरे पूरा हुन्छ तमाम कार्य सजिलै आत्मीय आभा छरे ढुङ्गा फुट्छ यहाँ बजार घनले पीठो धुलो बन्दछ जागौँ हे ! जनता जुटौँ समयमै नेपालले भन्दछ ।
बिन्दु दहाल मुकदर्शक :
कालो सर्प फणा फिजाउँछ उँधो डस्ने इरादा गरी
मेरो यो घरमा पस्यो अब सधैं टोक्ने भयो बेस्सरी
लुक्दै डस्न उँभो उठाउँछ फणा तर्केर भाग्दै छु म
बाँच्नै मुस्किल हुन्छ आज कसरी मारौँ कि भन्दै छु म ।
निद्रामा सपना बिगार्छ कहिले झस्का खुबै पार्दछ
साँच्चै आपतमा बनाउँछ सधैं आशा सबै मार्दछ
थुप्रै छन् घरमै सजाति उसका पर्खाइ रुङ्नेहरू
कालो काल बने कराल सबका कुप्रेर ठुङ्नेहरू
ढोकामा कहिले रहन्छ यसरी डस्ने गरी टाउको
भन्छन् ज्योतिषले रजाइँ घरमा चल्दै छ रे राहुको
पन्छाई ग्रहशान्ति गर्न अब को? जुट्ने यहाँ कर्ममा
लौरो खोज्नु शिवाय छैन सबले हानौँ दह्रो मर्ममा
यो वाचा सबले गरी मनमनै उठ्ने जमर्को गरे
पूरा हुन्छ तमाम कार्य सजिलै आत्मीय आभा छरे
ढुङ्गा फुट्छ यहाँ बजार घनले पीठो धुलो बन्दछ
जागौँ हे ! जनता जुटौँ समयमै नेपालले भन्दछ ।
०००
दमक, झापा