नेपाली हास्यव्यङ्ग्य अनलाइन पत्रिका

कलानिधि दाहाल :

जे बोलिन्छ त्यही त्यस्तै कविता हुन्न हो कवि
जे देखिन्छ त्यही त्यस्तै कविता हुन्न हो कवि !
जे गरिन्छ त्यही त्यस्तै कविता हुन्न हो कवि
जम्मै भित्र सजाएर कलाको दिव्य होस् छवि !!

जे बोलिन्छ त्यहीँ लेख्नु गफको गाइने कवि
जे गरिन्छ त्यही लेख्नु अज्ञानभित्रको कवि !
सम्भाषण छ जे लेख्नु नाराको हुन्छ त्यो कवि
जम्मै भित्र रही छोप्न दिव्यको निस्कियोस् छवि !!

आँसु गरिबका हुन्छन् दर्द हुन्छन् असैह्यका
पीडा व्यथा यता जम्मै तिनमै छन् असैह्यका !
धनी हुङ्कारमा हुन्छन् गर्जना छन् असैह्यका
अपराध सबै काला तिनमै छन् असैह्यका !!

सब हुन् कविता रानी कवितैभित्र आउँछन्
द्वन्द्व हुन्छन् यिनैभित्र नभए मुस्कुराउँछन् !
जिन्दगीभित्रका रूप दुईमै छन् टनाटन
प्रकृतिका यता यस्तै रूप छन् दुईटै क्रम !!

दुईका दुइटै रूप विषयान्तर मात्र हो
दुवैलाई सँगै मुछ्नु लेखनी वारपार हो !
समन्वय हुने शैली आआफ्ना बन्दछन् तर
कलाको भित्रको ज्योति टल्कनै पर्छ सुन्दर !!

सत्ता हुन्छन् सधैँ उस्तै पाखण्डहरूका घर
ब्वाँसा चाप्लुसका सत्ता लाम लाग्छन् निरन्तर !
तिनमा कविता हुन्नन् क्वै हुन्नन् तिनमा कवि
सामग्री हुन् सबै कच्चा छोप्ने कवित्वको छवि !!

देश निरीहको गीत नबनोस् सिर्जना ममा
केही सञ्चयको जीत नबनोस् सिर्जना ममा !
लालसाभित्रका गिद्दे दृष्टि क्यै नरहुन् ममा
धरा धप्प बनोस् खण्ड अखण्डभित्र सिर्जना !!

०००
कलेकुटी, काठमाडौं