नेपाली हास्यव्यङ्ग्य अनलाइन पत्रिका

हरिप्रसाद रिमाल :

के के न हुन्छ भन्थ्यौँ यो लोकतन्त्रभित्र
मात्रै बने फटाहा दुर्भाग्य दृश्यचित्र
सिङ्गो थियो हिजो यो नेपाल भूमिचित्र
भन्छन् बनाउँदैछौँ लुट्छन् गरे विचित्र ॥१

सत्ता छ आज थाङ्ने बन्दैछ यो लुटेरो
तर्साउँदैछ सारा पुग्ला कहाँ कटेरो
के सुन्छ ? दुष्ट हाम्रो मागेर खान्छ आफैँ
उल्टो झपार्न थाल्यो सत्ता भयो बिरामी ॥२

गर्थ्यो धमास लाखौँ तारा खसाल्न सक्छु
कालै कुदेर आए गोही बनेर डस्छु
यो देशको पुजारी बन्नेछु है जुझारु
भन्थ्यो गरेन केही ओछ्यानको मधौरु ॥३

स्वाँ स्वाँ गरेर बोल्दै भन्दैछ खान्छु के छ ?
निल्नेछु एकलै यो सिङ्गो रहन्न देश
मुर्दा समान मान्छे यो देश हाँक्छु भन्छ
बाँढेर देश हाम्रो चिल्दै विशुद्ध ठान्छ ॥४

यस्ता सबै यहाँका नेता भनाउँदा छन्
आफ्नो भलो सबैले हेर्दा गनाउँदा छन्
भन्छन् ममात्र एक्लो यो देशको इमानी
हाँस्दै तिनै बकुल्ला छन् आज स्वाभिमानी ॥५

०००
झापा