खगेन्द्र नेउपानेनयाँ वर्षमा
हरेक पल फूलको देहव्यापार हुन्छ जहाँ पावर मनीले छुन्छ किनकि मान्छेलाई आम मान्छे भन्दा फरक मान्छे हुनु छ र त यहाँ फूलकै सौदा हुन्छ त्यसैले नयाँ वर्षमा फूल उपहार नदिनू मलाई नरमाइलो लाग्छ ।
खगेन्द्र नेउपाने :
नयाँ वर्षमा फूल उपहार नदिनू
मलाई नरमाइलो लाग्छ ।
फूलहरू हरेक बिहान
दुधले न्वाएका चिसा ढुङ्गाहरूमा चढिन चुँडिन्छन्
उस्को चिसो स्पर्षले फूलको न्यानो कोमलता
बिस्तारै कक्रिंदै जान्छ
ओइलाउँदै जान्छ
परिणाम
फूलहरू फूलबाट फोहर बन्छन्
र
कुनै गन्धे नालीमा आफलिन्छन्
त्यसैले
नयाँ वर्षमा फूल उपहार नदिनू
मलाई नरमाइलो लाग्छ ।
पिकनिक पार्टी र बर्थडेहरूमा
देवालय र मदिरालयहरूमा
फूलहरू अस्तव्यस्त हुन्छन्
बाँदरहरू टोक्छन् कविहरू नजरले छुन्छन्
आडम्बरीहरू मालाभरि डुब्छन्
साधारणहरू फूलकै सौदा गरेर नेता सामु पुग्छन्
तर
खर्बुजामाथि चुपी झरे पनि
खर्बुजा चुपीमाथि झरे पनि
काटिने त खर्बुजै हो
त्यसैले
नयाँ वर्षमा फूल उपहार नदिनू
मलाई नरमाइलो लाग्छ ।
गुराँस हेर्न डाँडा चढ्नेहरू वशाख छउन्जेल मात्रै हो
फूलको मादकता र मोहकता
जवानी रहुन्जेल मात्रै हो
बारी कान्लाबाट उठाएर
चीसा ढुङ्गा र बिलासी गर्धनहरूमा लुटाएर
हरेक पल फूलको देहव्यापार हुन्छ
जहाँ पावर मनीले छुन्छ
किनकि मान्छेलाई
आम मान्छे भन्दा फरक मान्छे हुनु छ
र त यहाँ फूलकै सौदा हुन्छ
त्यसैले
नयाँ वर्षमा फूल उपहार नदिनू
मलाई नरमाइलो लाग्छ ।
०००
गाैरादह, झापा
Subscribe
Login
0 Comments
Oldest
