नेपाली हास्यव्यङ्ग्य अनलाइन पत्रिका

ठाकुरप्रसाद अधिकारी :

आतेजाते बाटो कैद भएछ
खातेपाते पेट बैध भएछ
टाटेपाटे बैश बेहुलो भएछ
खुल्ला बाटोभित्र ‘प्रवेश निषेध’ शब्द कैद भएछ

यो श्रद्धैश्रद्धाको बाटोमा
स्वतन्त्रताको अभिव्यक्ति बाटो
आत्माको मिलन र बिछोड बाटो
सृष्टिभित्रको सुस्केरा र सुसेली हुत्याउने
रङ्गभूमि भएछ बाटो
मलामी र सलामीको भोको भएछ बाटो

असङ्ख्य पाइला टेकिए पनि
बाटोमा कटुता छैन
प्यास छैन
हीनता छैन
आतेजाते बाटो कैदमा हर्षित छ
खातेपातेको बाटो बैंशबैंशमा मूर्च्छित छ
बाटो श्रद्धैश्रद्धाभित्र हाँसेछ
बाटो बृद्धैबृद्धाको पङ्क्ति देखेर रोएछ ।

०००
‘रोएको बाटो’ कविता सङ्ग्रहबाट