नेपाली हास्यव्यङ्ग्य अनलाइन पत्रिका

खगेन्द्र नेउपाने :

अहिलेसम्म थाहा छैन ए जिन्दगी !
तँलाई काटौँ कि तँलाई जिओैँ ?

अनेकन माछी काँडे डोरीको उल्झनमा
म जेलिउँ या छट्पटाउँ
ठाउँ ठाउँमा च्यातिएको छ उध्रिएको छ
कुन छेउमा टालौँ या सिलाउँ
युद्ध छ जताततै
कोसँग लडौँ या मद्दत मागौँ
कस्को शत्रु बनौँ, कस्को बनौँ हिमायती
ढुङ्गाका पहाडमा फूल फुलेको छ
म पत्थर उठाउँ कि फूल लिओैँ
अहिलेसम्म थाहा छैन ए जिन्दगी !
तँलाई काटौँ कि तँलाई जिऔँ ?

मलाई त कर्मको अधिकार मात्र दिइस् रे
फल त अर्कैसँग छ भन्छ
पर इक्षित फल पनि कहिले मिल्छ
मान्छेहरु भन्छन्
यो जन्मबाट अर्को जन्मसम्म
फलको आशमा भट्किरहनु पर्छ
कहिलेकाहीँ त इशारा दे न जिन्दगी
मैले यहीँ जन्ममा केही लिऔँ
अहिलेसम्म थाहा छैन ए जिन्दगी !
तँलाई काटौँ कि तँलाई जिऔँ ?

मलाई किनारा पनि थाहा छ
नाउँ पनि त छ मेरो
तर तेरै यो भूवरीमा
हर तुफानले लाउँछ घेरो
कोशिस हजारौँ बनाएँ
र धोका पनि धेरै खाएँ
बुद्धि विवेक अनेकौं देखेँ
समयले सिकायो
तर समयमै सिकाएन
तँलाई पछ्याउँदै यहाँसम्म आएँ
अब कुन निणर्य लिऔँ
अहिलेसम्म थाहा छैन ए जिन्दगी !
तँलाई काटौँ कि तँलाई जिऔँ ?

०००
गाैरादह, झापा