नेपाली हास्यव्यङ्ग्य अनलाइन पत्रिका

कलानिधि दाहाल :

रङ्गीन रङ्गका स्वाँगे सत्ता खल्ला सधैँ किन
कुर्सी लालचका ग्वाँगे यता चल्ला हुने किन ?
विनाचप्पलका भाङ्ग्रे नाङ्गा आङ चिथोरिने
गजक्क पुगी सत्तामा साँढे साँढ लठारिने !!

फुर्ती तुक्का झिकी गर्ने चुच्चे नक्सा सजाउँने
अन्तर्वार्ता भए सामु आफ्नै स्वार्थ बजाउँने !
मोली पाउ उसैबाट चढ्ने अग्ला धरोहर
नपाए स्वार्थको पोल्टो निकाली छर्छ फोहर !!

अर्को साँढे यता आयो सुँघ्दै रगतका कर
भोको पेट निमोठेर सिध्यायो कतिका घर !
डुक्रेको अहिले देख्छु ऊ नै फुकेर फाँटमा
जनरक्त पिई मोटोघाटो ऊ नै छ आँटमा !!

सफाचट अझै गर्छु भन्दै डुक्रिन्छ ङुर्ङुर
उसकै शिरमा पाती चढ्छन् बाँनरका खुर !
रक्तधार उही बग्छ पुरस्कृत हुने उहीँ
साँढे साँढे जुधेका छन् पाउले कुल्चिदै मही !!

नबोली घोप्टिने अर्को पत्नी इसार सारमा
भ्रष्ट सर्बतको घोल पिउँदै छ हतारमा !
विक्री गर्न लगाएर अस्मिता जनजीवन
यता तुन्छ उता उन्छ भत्केको भित्रको मन !!

पीठमा चढी अर्काको अर्को स्वर सुसेल्दछ
एक पञ्जो छ औँलोको माझमा पसी खेल्दछ !
झुसे झाले र माले यी कङ्कडे कणर् कर्करे
यमराज उता ठेली अझ चर्का भई सरे !!

ठेक्का लिन्छन् तिनै पत्नी गाला पुत्र फुलाउँछन्
छ यो लहर लाखौँको आफैँमा गुल्गुलाउँछन् !
गमक्क पर्दछन् भूष थैलाझैँ हल्लिँदै यता
ब्वाँसेमुख महा छुद्र राल काढ्छन् जतातता !!

निकम्मा मनको लाम निकम्मा तनको छत
कुहेका काठझैँ मेरो परिवेश छ लत्पत !
डुङ्ग गनाउँने टाढै धुवाँ फोहरको बनी
यिनै गिध्द पुजी बस्छन् सडेका भोटका जुनी !!

माथि खराबका पाता छाना दुङ्ग गनाउँछन्
तल लर्बरका खाता आफैँ च्यात्ने बनाउँछन् !
गन्धमा गन्धको खेल अन्धराज सजाउँछ
परिवेश गरी बन्द ऊ नै खुट्टा घुमाउँछ !!

०००
काठमाडौं