नेपाली हास्यव्यङ्ग्य अनलाइन पत्रिका

कलानिधि दाहाल :

प्रलोभनका नामले
अँगारमा
स्फटिक देख तिमी
चेतनभिखारीको
भीड जम्मा गरेर
तिमी हात कमाउँदै
मञ्चमा
डलर आह्वान गरिरहुँ
त्यो तिम्रो महानता हो
म अँगारमा
भिख माग्दै गरेको
एउटा कथित
राष्ट्र कविको
छाया मात्र देख्छु
तिमी स्फटिकलाई
हिलोमा मुछेर
देशको कुरा गरिरहुँ
त्यो तिम्रो
वेतलौरीको मिजास हो
म त्यसमा
सीमा कोरेर दिनरात
रातोदिन
जनहड्डीको रस चुस्दै गरेका
स्वघोषित राष्ट्रवादी
जलगैँडे नेताहरू
थलगैँडे कर्मचारीका
काला अनुहारहरू मात्र देख्छु
पेन्सनपट्टाको भोकले
तिमी भक्तिको
बाँसुरी बजी रहु
म त्यसमा
मात्र दासताको
पिलन्धरे बाँच्नै नपरेर
लड्खडाएको अनुहार देख्छु
तिमी
चिप्ले किराको भाषामा
वाह ! वाह !! कमाएर
भ्यागुतालाई
तारा ठानिराख
म झुसिल्किराको
जगर फैलाएर
धारे हात खाइरहन्छु
र तारालाई
तारा नै भन्छु
भ्यागुतालाई
कुवा नै भन्छु
भतुवालाई
भातमारा
र ताण्डव तन्केका
तिम्रा शिरशोभित
नेता
कर्मचारी
यिनकै चाकडीका पुच्छर पक्रेर
कवि बन्ने
कविलाई
भाषाविद् बन्ने
भाषाविद्लाई
डलर छरेर
एकछिन् ताली खोज्ने
तालीकारलाई
म त्यही दर्जामा
हिलोको हात
खुट्टाभन्दा मुनि
पाइतालाभन्दा निकै तल
सतहको स्पेस मात्र दिन्छु
जहाँ उनीहरू उभिनलायक छन्
उभ्याउनलायक छन्
म पाउलाई
शिर ठान्दिनँ
र शिरलाई पाउ
म
म नै हूँ
र त म छु
तिमी
तिमी नै हौ
र त तिमीसँग
भ्रष्ट नेताहरू छन्
चम्चा पक्रेका
कविहरू छन्
पगरी गुताउने दास
पुच्छर हल्लाउँने
चम्चा भासहरू छन् !

०००
काठमाडौं