नेपाली हास्यव्यङ्ग्य अनलाइन पत्रिका

कलानिधि दाहाल :

गर्मी गर्मी अझै ज्यादा पीडा भित्र पिलाउँछ
पगाली हाडका टुक्रा पसिना यो बगाउँछ !
हप्प हप्प छ यो धप्प उभिँदै ढाल्छुझैँ यता
परपीडक नेता र गर्मी उस्तै जतातता !!

ज्वालामुखी उठेजस्तो चर्म चस्चस हुन्छ यो
बिच्छी भित्र पसी टोकी दुखेझैँ दुःख दिन्छ यो !
टपरेले ठगेजस्तै यजमानहरू यता
गर्मी पुरेत यो ओर्ली नाचेको छ जतातता !!

शक्तिसञ्चयका साथ गुण्डो जमात ओर्लियो
डकैती शीतका थोपा खोसी लिएर कुर्लियो !
गुण्डो दुर्वल ऊ भाग्छ तर भाग्दैन यो यता
लूट नायक नेताको गुरु बन्छ जतातता !!

आफैँ प्रचण्डको चण्ड अर्को छैन ऊ ठान्दछ
तानाशाह बनी भित्र बाबु हिट्लर मान्दछ !
हरिया प्रेमका प्याला घुड्काउँदछ घुट्घुट
प्रचण्ड चण्ड चार्वाक राम्रो पार्छ सफाचट !!

सेनाबूट उचालेर धुलो उडे सरी गरी
क्रूर सैनिकझैँ सोला दिँदै हिँड्छ घरी घरी !
निर्विवेकी कुनै आमा बच्चाकाल भई यता
घुमेझैँ आज यो गर्मी घुमेको छ जतातता !!

प्रणयी प्यारको घैँटो रित्तिएर फुटेसरी
प्रेमी उन्मादले ग्रस्त घाँटी ङ्याँक्न जुटेसरी !
भोको सिँह बनेको छ आज गर्मी यता किन
धर्म उन्मादका नेता नाचेझैँ नाच्छ छिन्छिन !!

ज्ञानविहीन विज्ञान आगो बारुदको बली
सभ्यता सार निख्लाम पारी गर्दछ खल्बली !
बरु जोगिन्छ मान्छे यो देखिने चिजमा कतै
तर अदृश्य ओर्लेर गर्मी खान्छ जताततै !!

छन्दका नाममा बन्द कस्ने बन्धनका गुरु
गुरु दुष्टहरूभन्दा दुष्ट गर्मी भयो सुरु !
भाषाभाव सबै मारी छन्दका स्वाङमा यता
कवि नाटकका भन्दा ज्यादा गर्मी जतातता !!

फोहोरी खेलका नेता गुण्डानायकका धन
भौतिक भूतका भोका हुन्नन् मानवका पन !
गर्मी गुण्डो महामुण्डो सण्डमुण्ड झरी तल
अधर्मी मुटुको बैँस ज्यादा गर्दै छ खल्बल !!

०००
काठमाडौं