नेपाली हास्यव्यङ्ग्य अनलाइन पत्रिका

कोमलप्रसाद पोखरेल :

धेरै सूरा हरतरहले देखिएका जुझारु,
बैला भैँसी सरह उपमा नाम तिम्रो दुधालु ।
बिस्टा सेतो पनि यदि मिले खान हुन्छौ हुरुक्क,
लेख्नै पर्ला अब गिनिजमा नाम तिम्रो खुरुक्क ॥

आँखा तिम्रा अति चहकिला द्रव्यमा छन् गढेका ।
भाका तिम्रा विष बमनका कार्यमा छन् जुटेका ।
तिम्रो भित्री हृदय बनिएको छ पाषाणयुक्त,
लेख्नै पर्ला अब गिनिजमा नाम तिम्रो खुरुक्क ॥

भन्ने गर्छौं अब छिटछिटो देश बढ्नेछ नित्य,
गर्नेगर्छौं हरतरहले ताण्डवी नग्न नृत्य ।
तिम्रैजस्तो अनुजबधमा हुन्न कोही हुरुक्क
लेख्नै पर्ला अब गिनिजमा नाम तिम्रो खुरुक्क ॥

त्यागी बन्दै पहिरन भिरी पुग्दछौ माथि माथि,
भोगी बन्दै नव महलमा भुल्दछौ चट्ट साथी ।
ब्वाँसाजस्तो जन उदरमा पस्न खोज्छौ सुटुक्क
लेख्नै पर्ला अब गिनिजमा नाम तिम्रो खुरुक्क ॥

तृष्णा तिम्रो भुवनभरमा देखिएको छ कामी,
गर्छौ इच्छा सबजन दिऊन् द्रव्य राखी सलामी ।
यस्ता तिम्रा कुटिल मनमा बास को बस्न सक्छ ।
लेख्नै पर्ला अब गिनिजमा नाम तिम्रो खुरुक्क ॥

हुन्थे पुर्खा अघिअघि यहाँ वीरताका निसानी,
ऐले ओड्छौ अनुज जनका रक्तको रामनामी
तिम्रा सारा गतिमति यहाँ अल्पिएछन् चटक्क
लेख्नै पर्ला अब गिनिजमा नाम तिम्रो खुरुक्क ॥

०००
सुरूङ्गा, झापा
‘म फर्केर आएँ’ (२०७८)