कलानिधि दाहालनहेरे पनि देखिन्छ !!
नहेरे पनि देखिन्छ उम्लेका दुधको घर निमिट्यान्न छ नामेट मिसिने मृत्तिका पर ! आउने हुन्छ त्यो बाटो जाने हुन्छ त्यहीँनिर कसरी मात्र हो भिन्न भयावह कहाँ छ र ??
कलानिधि दाहाल :
वर्षा ज्यादा भएको छ लिएझैँ घुसका बिटा
नेताका घर कन्तूर बाहिर जल बाछिटा !
रोक रोक न रोकिन्छ बिग्रेझैँ राजनीति यो
जनता छन् सबैतर्फ निरीह हीनभित्रको !!
वर्षाले झर्नु नै पर्छ भए ज्यादा घडाभर
नेताले झुक्नु नै पर्छ छ खल्ती जनको कर !
नडराई लिई बाटो जसरी झर्दछन् झरी
उम्लिएका सबै नेता जान्छन् बाढी बहेसरि !!
थाक्छ यो जलको शक्ति सीमापार पुगेपछि
अन्याय अघि नै थाक्छ दृश्यधार पुगेपछि !
देखिए दुइटै दृश्य थाकुञ्जेल मनोगति
थाक्छन् थाक्छन् दुवै थाक्छन् थाक्नेको छ अधोमति !!
शान्त शालीन सन्नाटा सौन्दर्य समसृष्टिको
मादउन्माद उल्लास जमात समसृष्टिको !
एक उच्छालमा उठ्दा अर्को देखिन्छ यो तल
चुपचाप हुने मात्र कहिल्यै हुन्न दुर्बल !!
प्रतीक्षा पलको मात्र पाला टल्पल छन् पल
नियामक हुने हुन्छन् अदृश्य दृश्यका स्थल !
देखिँदा लाग्छ अग्लेका सत्तापामरझैँ यता
जान्छ घट्छ र देखिन्छ अर्को शक्ति जतातता !!
धैर्यको धार मेटिन्न जत्रा बाढ चढुन् डिल
चरवक्ष बसेको छ कहिल्यै हुन्न थिल्थिल !
हल्ला गर्दैन ऊ हेर्छ सीमोल्लङ्घनको घडी
स्रष्टा नियमको न्याय कहाँ हुन्छ र गड्बडी !!
दायरा जसले तोड्छन् आफ्नै अस्तित्व चुँड्दछन्
चकनाचुर छन् गाडी जो बाटो छाडी गुड्दछन् !
काँध थापी हुने छैन राम नै बोलूँ हुन्न यो
ऊ आफैँ हुन्छ नामेट छ आफैँ छिन्नभिन्नको !!
छाया छन् छवि छन् पाउ छन् पदचाप चापका
इतिहास अझै राम्रा सर्वत्र सहीछापका !
रोकियो जल उन्माद नेता उन्माद खस्दछन्
पर्खूँ पर्खूँ सबै भ्रष्ट जञ्जीरभित्र बस्दछन् !!
नहेरे पनि देखिन्छ उम्लेका दुधको घर
निमिट्यान्न छ नामेट मिसिने मृत्तिका पर !
आउने हुन्छ त्यो बाटो जाने हुन्छ त्यहीँनिर
कसरी मात्र हो भिन्न भयावह कहाँ छ र ??
०००
कलेकुटी, काठमाडाैं
Subscribe
Login
0 Comments
Oldest
