नेपाली हास्यव्यङ्ग्य अनलाइन पत्रिका

खगेन्द्र नेउपाने :

उहाँ त प्रधानमन्त्री मात्रै भैदिनुभाको हो
राज्य त तपाईंहरूको चल्ने हो
भाग्य त तपाईंहरूको बल्ने हो
अनुदानले झोला भर्ने तपाईंको हो
विदेश भ्रमण चिठ्ठा पर्ने तपाईंको हो
तपाईंले नै पदक पाउने हो
तपाईंकोमै मान्छे धाउने हो
तपाईंले नै धाक धमास र फूर्ती लाउने हो
उहाँ त प्रधानमन्त्री मात्रै भैदिनु भाको हो ।

उहाँ त मन्त्री मात्रै हुनु भाको हो
मौका चैं तपाईंको आको हो
ज्वाईं ससुराली उठाउनुहोस्
मिठो मसिनो जुटाउनु होस्
भन्सारबाट बिना कर माल छिराउनुहोस्
मस्ती आफू गर्नुहोस्
दोषजति उतै भिराउनुहोस्
माल झरुन्जेल पछि लाग्नुहोस्
नझरे अन्तै भाग्नुहोस् ।

वर्षौंदेखि विचौलियाको ताण्डव हेर्ने हामीहरू
मौका परे आफैं भेद्ने आफै बन्ने धामीहरू
देखेर निश्वास फेरिरहेछौँ
कहिले यसलाई कहिले उसलाई
हेरिरहेछौँ
जस्तो मादल उस्तै तालमा नाच्नुहोस्
जस्तो हाल उस्तै कम्मर भाँच्नुहोस्
बधाईं छ विचौलिया जी !

०००
गौरादह, झापा