बिन्दु दहाल ‘मूकदर्शक’पनि लेख्नुपर्छ
भालेहरूले गति छाड्न थाले पोथीहरूकै पछि पाउ चाले । बोकाहरूले सब दाइँ गर्छन् यी गोरु राँगा चुपचाप हेर्छन्, यस्तो जमाना किन देख्नुपर्छ ? लेख्दै नलेख्ने पनि लेख्नु पर्छ ।
बिन्दु दहाल ‘मुकदर्शक’ :
दुब्लाहरूले अब बुझ्नु पर्छ
कुप्राहरूले पनि कुद्नु पर्छ
यी स्याल ब्वाँसा सब मर्नु पर्छ
आए समस्या नित टर्नु पर्छ ।
ढुङ्गाहरू हो अब उठ्नु पर्छ
ए भ्यागुता हो सुन जुट्नुपर्छ
गोही जुकाले खुन खान थाले
ढाडेहरू मन्दिर जान थाले ।
अर्ना भए यी नव सर्वहारा
छन् बारुला यी किन ज्यानमारा ?
भालेहरूले गति छाड्न थाले
पोथीहरूकै पछि पाउ चाले ।
बोकाहरूले सब दाइँ गर्छन्
यी गोरु राँगा चुपचाप हेर्छ्न्
यस्तो जमाना किन देख्नुपर्छ ?
लेख्दै नलेख्ने पनि लेख्नु पर्छ ।
लार्भाहरूको गणना हुँदैन
बेस्मार खान्छन् विधिले छुँदैन
मार्छन् मुसाले सजिलै बिराला
छन् मार्ग हिँड्ने अहिले भिराला ।
०००
झापा
Subscribe
Login
0 Comments
Oldest
