नेपाली हास्यव्यङ्ग्य अनलाइन पत्रिका

अमर अधिकारी :

फुट्या कौडी नदेखेका विदेश घुम्न पाए
जनतालाई भुलाउन खोक्रा गीत गाए ।

फटाहाले घरिघरि जनतालाई ठगे
छोराछोरी बिहे गर्दा सुनकै बनाए जग्गे ।

माफिया र ठेकेदारलाई हुनुसम्म फकाए
जनतालाई जानीजानी ऋणको भारी बोकाए ।

अझै पनि खेल रच्छन् मुलुक उधो लाउन
छाडेनन् नि जहानसहित विदेशतिर धाउन ।

सल्लाहकार सहयोगी ज्ञान नभएका
इमान्दार जनताले कति हो सहेका ।

चुप्प लाग्ने बानी बस्यो नेपाली यी जनको
नेताहरू धनी बने धनमाथि धनको ।

देशमा काम नपाएसि युवाहरू खाडी
गोठहरू रित्ता भए छैनन् पाडापाडी ।

पढेका ती युवाहरू अन्तै देशमा जान्छन्
कामविहीन भएपछि अनि हण्डर खान्छन् ।

बाकसमा लास आउँछ हाम्रो विमानघाटमा
बाउआमालाई निद्रा छैन पल्टिएर खाटमा ।

फटाहाको जगजगी नेता सबै चुप छन्
मुलुक उधो लाग्यो बरै झनपछि झन् ।

ठगैठगले डुबाइसके सानो हाम्रो देश
केही होला भन्दाभन्दै फुलिसक्यो केस ।

बाँदरको हातमा पर्योै हाम्रो राजनीति
राजनीति त बहाना हो भनौँ लाजनीति ।

०००
खुङ्ग्री, रोल्पा ।
हालः बुढानिलकण्ठ, काठमाडौं