नेपाली हास्यव्यङ्ग्य अनलाइन पत्रिका

खगेन्द्र नेउपाने :

ए ! झोला बोक्यौ ?
जाऊ बाबु, जाऊ नानी जाऊ
अष्ट्रेलिया जाऊ, अमेरिका जाऊ
हङकङ जापान जहाँ जान्छौ जाऊ
हामी त्यहीँ ठग्न आउँला ।

धर्मको डण्डा बोकेर
जादुको अण्डा बोकेर
कलाकारिताको फण्डा बोकेर
आफन्तहरूलाई विदेश घुम्दैछु भनेर सुनाउँला
फाटेको स्वरमा साटेको गीत गाउँला
क्यारिकेचर गरौँला
निधारभरि आडम्बरको चाँदन भरौँला
तिमीले रगत बगाएर कमाएको
अलिकति डलरमा आँखा लाउँला
जाऊ है जाऊ जहाँसुकै जाऊ
हामी त्यहीँ ठग्न आउँला ।

कतै तिमी खाडी मलेसिया जाँदैछौ भने
हामी यहीँ बसेर ठगौँला
मेनपावर बनेर डसेर ठगौँला
एयरपोर्टभित्र पसेर ठगौँला
गाउँ गाउँमा कित्ता काटेर ठगौँला
सुनको नाउँमा
पित्तल साटेर ठगौंला
तिम्रो पसिनाको पैसामा
हाम्रो र्याल चुहिसकेपछि
जब इमान्दारीता र विश्वास कुहिसकेपछि
नयाँ नयाँ बाटो समाउँला
हामी त्यहीँ ठग्न आउँला ।

यति सुन्दर देशमा तिमी ठगिन जन्मिएका रहेछौ
घरमै बसे पनि ठगिन्छौ
गुन्टा कसे पनि ठगिन्छौ
आस्था मन्दिरको गेटबाट ठगिन्छौ
निर्वाचनको ब्यालेटबाट ठगिन्छौ
विश्वविद्यालयका मान्छेबाट ठगिन्छौ
मन्त्रीका भान्छेबाट ठगिन्छौ
त्यसैले
यहाँ नबस जाऊ जाऊ
जता जान्छौ जाऊ
हामी त्यहीँ ठग्न आउँला ।

०००
गौरादह, झापा