नेपाली हास्यव्यङ्ग्य अनलाइन पत्रिका

उत्तम विचार :

म कुर्सीमा कुर्सी अदल नगरी बस्न म सकूँ
लुटूँ रित्तो पारी मुलुक नभनी डस्न म सकूँ ।
कुरी गाईजात्रा खितखित गरी हाँस्नु म कति
चलून् नौला जात्रा दिनदिन यहाँ ठान्छु प्रगति ॥१।

विपक्षी पक्षीझैँ वरपर पसी काक नभनून्
दिलाई अप्ठ्यारो अतिशय कतै भाग नभनून् ।
विनाकुर्सी मेरो न त निद परोस् रातदिनमा
भनी कुर्सी कुर्सी तडपन खपूँ व्यर्थ किन म ॥२।

मिलोस् सत्ता भात्ता प्रगति पथमा हिँड्न म सकूँ
सँगै लामो जत्था दलबल हुँदा भिड्न म सकूँ ।
म गुण्डागर्दीमा सबल बललेयुक्त म रहूँ
कसैको धम्की वा खटन किन होस् व्यर्थ नसहूँ ॥३।

म भ्रष्टाचारीको जय जय नगरी बाँच्नु कसरी
इशाराको पारा र लय नबुझी नाच्नु कसरी ।
मरून् भोका नाङ्गा पलपल लुटी पेट म भरूँ
सुनामीको नामी लहर नउठोस् व्यर्थ नडरूँ ॥४।

व्यवस्थामा नौलो बहुदल मिली खान कसिएँ
जता बज्छन् बाजा फुरफुर उतै पो लहसिएँ ।
अरू सारा दोषी छलकपट गर्ने छु अछुतो
भनी कुर्सी ताक्दा मुलुक थलियो लाग्छ पछुतो ॥५।

०००
काठमाडौं