नेपाली हास्यव्यङ्ग्य अनलाइन पत्रिका

खगेन्द्र नेउपाने :

छोेड्दिनु जेठा बा !
कुर्सी छोड्दिनु
आउनु हामीसँगै बसौँ ।

अब त तपाईं पनि बूढो हुनु भो
बेला बेला होस खुस्किरन्छ
जति तानतुन गरे पनि
बेला बेला सुरुवाल फुस्किरन्छ
बेलाबेला बर्बराउँनु हुन्छ
हिँड्दा लर्बराउनु हुन्छ
अरुले भरथेग गर्नुपर्छ
तेरो मेरोको अनावश्यक झर्को छोडेर
अध्यात्मको सुन्दर बर्को ओढेर
आउनुहोस् बा ! हामी सँगै बसौँ ।

तपाईं कुर्सीमा बसिरहँदा
कतिलाई त काइदा भएकै छ
ठेक्का कमिसन पद पैसा
कतिलाई त फाइदा भएकै छ
बज्र स्वाँठले पुरस्कार पाएकै छन्
दायाँबायाँ अघिपछि फोटो खिचाएकै छन्
बेलाबेला तपाईंको किचनबाट फुत्त निस्कन्छन्
पावरफूल चस्मा लाउँछन्
पावर नपाए छोडिदिन्छु भन्दै जिस्कन्छन्
उमेर नपुगेका अदन्तेलाई माथि चढाइदिनु भो
जोरी खोज्ने जोधाहालाई तल लडाइदिनु भो
कसैको लागि मुढो हुनु भो
कसैको कलमको टुँडो हुनु भो
जेठा बा ! कुर्सी छोड्दिनु
आउँनु हामी सँगै बसौँ
अब त बूूढो हुनु भो ।

हामीतिर आँखा नफुकाल्नु जेठा बा !
आज तपाईंको सत्तो सराप गर्नेहरू
हिजो तपाईंले भान्सा चटाएकाहरू हुन्
सुटुक्क बार्दलीमा बोलाएर
मन्त्र रटाएकाहरू हुन्
आज अर्काथरी बढेका छन्
भक्तिगानको पगरी लगाएर
मञ्चमा ढक्क चढेका छन्
पछिल्लो ढोकाबाट छिर्छन्
बिना योग्यताको पदक र तक्मा भिर्छन्
चाट्न नपाएको दिन
यिनीहरूले पनि तपाईंलाई छोड्ने छन्
फुकाल्नुहोस् यति धेरै जुम्रा भएको दौरा
कुर्सी छोड्दिनुहोस्
आउनुहोस् हामी सँगै बसौँ ।

०००
गौरादह, झापा