नेपाली हास्यव्यङ्ग्य अनलाइन पत्रिका

खगेन्द्र नेउपाने :

मान्छे ठान्छ
भगवानले पनि घुस खान्छ
त्यसैले पैसा बोकेर मन्दिर जान्छ
थान थानमा पैसा चढाउँछ
र भन्छ हे भगवान !
मेरो कामना पूरा गरिदेउ !

बोका र कुखुरा चढाइसकेपछि
नापीको हाकिमले
यताको सिमाना उता सारीदिन्छ
बोका र कुखुरा चढाइसकेपछि
मन्दिरभित्रको भगवनले दसा टारिदिन्छ
फूल चोखो चाहिन्छ
पैसा जतिसुकै फोहोरी भए पनि चल्छ ।

धेरै चोखा मान्छेहरू
निधारमा भागवत् भक्तिको विज्ञापन कोरेर
गेरुरङ्गले नस्वर शरीर मोरेर
छातीमा टाँसिएकोे खल्तीभरि
बोका सुँगुरको रगत लागेको नोट
बोकेर हिँडिरहेका छन्
जो भागवतको यज्ञमा चढाइएको थियो
किनकि भगवानलाई फूल मात्रै चोखो चाहिन्छ
नोट फोहारी भए पनि चल्छ ।

०००
गौरादह, झापा ।