नेपाली हास्यव्यङ्ग्य अनलाइन पत्रिका

बिन्दु  दहाल मूकदर्शक :

पारेर एउटै अन्डा कुखुरी गीत गाउँछे
खोल्याँसोबाट उफ्रेर धुरीमा चढ्न धाउँछे।१

अन्डा हजार पारेर कछुवा चुप्प बस्दछ
देख्लान् कि अन्यले भन्दै सरक्क प्वाल पस्दछ ।२

हल्लाको देशमा हल्ला बिक्दै छ जहिले पनि
साहित्यमै छ व्यापार हेर्नुहोस् अहिले पनि ।३

हल्ला नै नगरी बस्दा सडेर जान्छ चामल
फोहोर बिक्छ हल्लाले पिठारी बन्छ काफल ।४

हल्ला नै नगरी बस्दा हजार गुमनाम छन्
टक्का र खुजुरा आज देवका धाम धाम छन् ।५

हल्लाकै लागि लाइन्छ्न् पुराण र कुरान ती
नत्र हुन्थ्यो झिके राम्रो ठ्याक्रा माइक घातकी ।६

हल्लामा शक्ति देखिन्छ हल्ला गरौँ निरन्तर
बनौँ हामी अझै उच्च हल्लामा आत्मनिर्भर ।७

राजधानी गरी हल्ला राजधानी भएको छ
बृहस्पति सधैँ झुट्टा एक्लोमात्र भएको छ ।८

हल्लाले देश सप्रिन्छ हल्ला गरौँ सधैंभरि
हल्लाऔँ बर्बरी झर्छन् स्वार्थका फल बेस्सरी ।९

कवितामै गरेँ हल्ला हल्लाको भक्त मै पनि
ठुटे पुच्छर हल्लाऔँ सके जति अझै पनि ।१०

०००
दमक- ८ झापा