नेपाली हास्यव्यङ्ग्य अनलाइन पत्रिका

नवराज कार्की :

भन्छन् नि भित्ताको पनि कान हुन्छ
कान होला र त सुन्छ
सुन्छ होला र बोल्छ

भित्तो बोलेको नबुझ्नेहरू
कति भित्तामै पुगे
भित्तोले धेरैसित
धेरै कुरा बाँडेको छ
भित्तोले धेरैको, धेरै उछित्तो काढेको छ

हाम्रै घरको साधारण भित्ताकै कुरा गर्छु
त्यहाँ हुजुरबाको फोटो थियो- लाहुरे हुँदाको
हजुरआमाको फोटो थियो- दुलही हुँदाको

छोराको दीक्षान्तको फोटो थियो
उसकी स्वास्नीको फोटो थियो
सबैभन्दा नयाँ, नातिको पास्नीको फोटो थियो
भूकम्पले घर भत्काएपछि पनि
त्यो भित्तो भने ठडिएकै थियो
विना छत पनि त्यो अडिएकै थियो
अरु सबै त भुइँचालाले भत्काएको हो
तर त्यो भित्तोचाहिँ हामीले नै भत्कायौं

हामीले राम्ररी भत्काएको त्यो सानो भित्तोले त
मलाई नराम्ररी भत्काएर गएछ
ठानिरहेको थिएँ
त्यो ढुङ्गामाटोको भित्तो
अब सधैंका लागि ढल्यो
तर त्यस्तो भएनछ,
त्यो भित्तो त मनको भित्तामा पो सरेछ
त्यो अब कहिल्यै नढल्ने भएछ !
हो, अब, कहींंकतै नचल्ने भएछ ।

०००
अगस्ट २०१७
अमेरिका