नेपाली हास्यव्यङ्ग्य अनलाइन पत्रिका

खगेन्द्र नेउपाने :

ऊ हावाका फूलहरु फुलाउँछ
र माइकका पसलबाट
सुगन्ध बिक्री गर्छ
त्यही सुगन्धकाे तरङ्गमा लहरिएर
म स्वर्गीय आनन्दकाे यात्रा गर्छु
र भन्छु
आहा !

अर्कैले तयार गरेकाे गद्दाशनमा
गजधम्म बसेर
अर्कैले श्रम गरेकाे
अन्नपकवान्नबाट टमक्क पेट कसेर
बिना श्रम हावाका फूलहरु फुलाउँछ
र माइकका पसलबाट
सुगन्ध बिक्री गर्छ ।

म
अन्नबाेटका जराहरुबाट
जीवन केलाएर
अक्सिजनका केस्राहरुसँग मुछेर
शक्तिको पाइताला टेक्ने प्रयासरत
एउटा मान्छे
उस्काे परिभाषामा
हावाका फूलहरु नदेख्ने
मूर्ख मान्छे
उस्का प्रत्येक शब्दमा पछारिएर
अतिविश्वासकाे पानी पिएर
निरर्थक जीवन जीएर
समय उघ्राईरहेकाे
उस्काे भाषामा
हावाकाे सुगन्ध नचिन्ने
अईश्वरीय मान्छे
अगाडि राखेेर
माइकका पसलबाट
हावाका फूलहरुकाे व्यापार गर्छ
र त्यहि अमूर्त तरङ्गकाे लहरसँगै
बहकिएर भन्ने गर्छु
आहा !

०००
गाैरादह, झापा