नेपाली हास्यव्यङ्ग्य अनलाइन पत्रिका

देवीप्रसाद चापागाइँ :

दैनिक घोटिने शिक्षक बनाऊ
बरु, मन्त्रदान दिने दीक्षक बनाऊ ।
गेटको अगाडिको मूर्तिवत् पाले बनाऊ
विन्ती छ भगवान् । लाज पचेको साँढे नबनाऊ ||

हिउँसँगै जिस्किने डाँफे बनाऊ
तिम्रो चित्तले खान्छ भ्रमर बनाऊ ।
असमर्थ भए दैनिक उम्रिने दारी बनाऊ
विन्ती छ भगवान् ! धोतीविहीन साँढे नबनाऊ ||

आफ्नै बुद्धिले चल्ने पाइलट बनाऊ
अहोरात्र सेवामा खट्ने डाक्टर बनाऊ ।
कुहिनाको छाला जाओस् स्रष्टा बनाऊ
विन्ती छ भगवान् ! छिल्लिएको साँढे नबनाऊ ॥

रात दिन खटिनुपरोस् बरु गृहिणी बनाऊ
प्रसव वेदना बरु सहुँला आमा बनाऊ ।
जे होस् चर्को बुहार्तन केही समयका लागि हो बधु बनाऊ
विन्ती छ भगवान् ! उरन्ठेउलो साँढे नबनाऊ ||

मन लाग्छ हाँगामा भुन्डिएको पिङ बनाऊ
सक्छौँ बच्चा सुताउने आमाको मुखको लोरी बनाऊ ।
सकिंदैन दैनिक चन्दन घोट्ने खोरी बनाऊ
विन्ती छ भगवान् ! लगौटीविहीन साँढे नबनाऊ ॥

निरन्तर बग्नु परोस् बरु नदी बनाऊ
रातमा चम्किनु परे परोस् तारा बनाऊ ।
हिउँको ठिही पिउँला बरु हिमाल बनाऊ
बनाउनै परे नेताको अनुहार मिल्दो साँढे नबनाऊ ||

०००
बड्काैँला (२०७८)