नेपाली हास्यव्यङ्ग्य अनलाइन पत्रिका

कलानिधि दाहाल :

न चाहेर आएँ न चाहेर जान्छु
न नाना र खाना नयाँ सोख मान्छु !
चढूँ शैल भन्दा म खोलो सिरानी
छ पट्यार लाग्दो यही जिन्दगानी !!

म ज्वालामुखीझैँ बलूँ ज्योति भन्थेँ
सधैँ नेत्र खोलेर तारा म गन्थेँ !
न आकाश पाएँ न तारा बिहानी
छ पट्यार लाग्दो यही जिन्दगानी !!

म सानो मुना हेर्दथेँ टारबारी
भई साहसीझैँ शिलाफाँट घारी !
लिएँ स्वप्न ज्यादा छु जानी नजानी
छ पट्यार लाग्दो यही जिन्दगानी !!

कुदेँ हर्ष आक्रोशका वेग बोकी
पढेँ कण्ठ घाँटी कराएर घोकी!
निराधार सारा रहेछन् कहानी
छ पट्यार लाग्दो यही जिन्दगानी !!

गरी लोभ धेरै म लोभी भएँछु
परी प्यार नाचेँ म भोगी रहेँछु !
तिनै गन्धका अन्ध आँखा जवानी
छ पट्यार लाग्दो यही जिन्दगानी !!

म माया भुलेको भ्रमी जालभित्र
उठाएँ उचालेँ अहङ्कार चित्र !
निराकार देख्दै छु आकार तानी
छ पट्यार लाग्दो यही जिन्दगानी !!

रटेँ देश बोकेँ र झण्डा उठाएँ
लगाएर नारा धनी बन्न पाएँ !
भए यी चिताका अँध्यारा कहानी
छ पट्यार लाग्दो यही जिन्दगानी !!

सिँगारेँ मजाले सबै देह भन्दै
बसेँ नोट ज्यादा नयाँ भित्र गन्दै !
भयो भार अग्लो धनीको जवानी
छ पट्यार लाग्दो यही जिन्दगानी !!

न खोजेँ छ बल्ने कतै चेतज्योति
धराधाम गैह्रो चमत्कार मोती !
सबै मार्ग खाली छु सुख्खा खरानी
छ पट्यार लाग्दो यही जिन्दगानी !!

०००
कलेकुटी, काठमाडाैं