नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´

युवाजोस हाम्रा, पुगे बालुवामा ।
नयाँ शक्ति को भर्छ यो पालुवामा।।
दशा रोग चिन्ता, हटून यो धरामा ।
नयाँ वर्ष छाओस्, चनौटे गरामा ।।-१

यहाँ भ्रष्ट रम्छन्, छली मामिलामा ।
बढेको छ पीडा, कुना कन्दरामा ।।
युवा वृद्ध वृद्धा, जुटून् वन्दनामा।
नयाँ वर्षले हर्ष ल्याओस् धरामा ।।-२

भला साधु लाग्छन्, उँचा भावनामा।
डुबे ठालु हाम्रा, वृथा साधनामा।।
नयाँ शिल्प जागोस्, कला सिर्जनामा।
युवा शक्तिशाली, बनून् यो धरामा ।।-३

फलून् अन्नबाली, तराई गरामा ।
रमून् याक चौँरी, हिमाली धरामा।।
गढी लेक बेँसी, उकाली कुनामा ।
नयाँ वर्ष छाओस्, पहाडी धरामा।।-४

सुगा कोइलीले, मिठा गीत गाऊन्।
चिबे काग मैना, र डाँफे रमाऊन् ।।
जरायो खरायो, दगुर्छन् वनैमा ।
नयाँ वर्ष हाँसोस्, यहाँको धरामा।।-५

ठगी दुष्ट जाली, हटून् धूर्त डाँका।
सबै सर्वहारा, बनून् एकढिक्का।।
युवा पङ्क्ति लागून्, कडा साधनामा।
नयाँ वर्ष छाओस्, यहाँको धरामा।।-६

कडा चालबाजी, नहोस् खेल झेल।
बढोस् कोष हाम्रो, सधैँ सालसाल।।
छली कर्म क्रीडा, नहून् योजनामा।
नयाँ वर्षले शान्ति, ल्याओस् धरामा।।-७

०००
बट्टार, नुवाकोट । हाल: बालाजु, काठमाडौँ ।