नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

जतै जाल थाप्ने भए श्रेष्ठ मान्छे
अघाउन्न खाई अहो लुब्ध भान्से
सधैँ चाङ लाग्छन् समस्या हजार
म ता जान्न साथी छ चर्को बजार । १

पुरानै छ पारा पुरानै छ ढर्रा
उही ढाँट बोली भयो मित्र ठर्रा
इमानीहरूको जवानी लिलामी
हुँदा चुप्प बस्छौँ दिई झन् सलामी ।२

दुखीका अनेकौँ भए दर्द पीडा
धनी भोग्छ आनन्दले मस्त क्रीडा
सिटामोल किन्नै नसक्ने यहाँ छन्
उता राजधानी अकासिन्छ झन् झन् ।३

अँध्यारो छ नेपालको मानचित्र
सधैँ आँसु झर्दै रुने गेहभित्र
गने ती करोडौँ भए आजसम्म
भयो देश रोगी कुरा छन् अचम्म ।४

खरानी घसेका जुगुल्टा कसेका
फलैँचा रुँगी धूर्त जोगी बसेका
सुधी सन्त जस्ता सबै झट्ट हेर्दा
मुडी हुन्न ज्ञानी नयाँ वस्त्र फेर्दा ।५

०००
दमक, झापा