नेपाली हास्यव्यङ्ग्य अनलाइन पत्रिका

दिव्य गिरी :

१. मूर्ति र मान्छे

एउटाले जङ्गलमा फेला परेको
ढुङ्गालाई कुँदेर
देवताको मूर्ति बनेपछि
मन्दिर बनायो
र, मूर्तिलाई भित्र राख्यो
अर्कोले त्यही मूर्तिलाई
जीवनभर ढोगेर
जीवनभर पूजा गरेर
आफैलाई देवताको भक्त बनायो
तर, बिडम्बना ।
ऊ आफैले मानवता नै बिर्सियो ।

२. कहिले ? कहिले ?

निजी विद्यालयले अभिभावकको पसिना चुस्छ
निजी अस्पतालले जनताहरूको रगत चुस्छ
बजारले गरीबहरूको रगत र पसिना दुवै चुस्छ
अब तपाईं नै भन्नोस् महाशय
यी चुसाहारूपी जुकाहरूबाट
नेपालीले मुक्ति पाउने कहिले ?
यो देशमा सरकार पनि छ है भनेर
जनताले गर्व गर्न पाउने कहिले ?
मनपरीतन्त्रको कोपभाजनबाट
सुरक्षित हुने कहिले ?
जबाफ सजिलै छ महाशय
तिम्रो प्रश्नको उत्तर हो –
कहिले ? कहिले !?!?

०००
महालक्ष्मी न.पा.५, टीकाथली, ललितपुर