नेपाली हास्यव्यङ्ग्य अनलाइन पत्रिका

काशीनाथ मिश्रित :

हुकुमी अब शासन छैन यहाँ
अधिनायकवाद रहेन यहाँ
न निरङ्कुशतन्त्र रहेछ यहा
खिचलो किन व्याप्त भएछ यहाँ !

अनुशासनहीन छ शासन यो
कशिपू शकुनी र दुशासनको
उपमा दिन योग्य भए अगुवा
लत छोड्न गए बिचमै भगुवा ।

महँगी शिरमा थपियो दिनहुँ
जनता सबको कति कष्ट कहूँ
जनता भनि नित्य दुहाइ दिने
व्यवहार भने छ रुवाइदिने ।

मुखमा न छ माड न एक धरो
दुखियाजनको न छ एकसरो
घरबार कहाँ छ कहाँ तिनको
सरकार बन्यो अब ता यिनको ।

रणतन्त्र कि यो गणतन्त्र भनौँ
’जन‘ शब्द थपेर खिसी नगरौँ
जन ता जनता सबलाइ भनौँ
निमुखा जनलाइ भने नभनौँ ।

अदना अबला असहायहरू
गर काल निमन्त्रण झट्ट बरु
जनजीवन सङ्कटमा पुरियो
गणतन्त्र भने धुरिमा चुलियो ।

दिनकै रणतन्त्र बढी रहने
तर मन्त्र भने गणतन्त्र हुने
षडयन्त्र र यन्त्र विकास हुँदा
अब मन्त्र भए रहने अधुरा ।

अनुहार नयाँ र विचार नयाँ
उपचार नयाँ व्यवहार नयाँ
नहुँदातक देश हुँदैन नयाँ
अब तन्त्र तुरुन्त गराउ नयाँ ।

०००
हालै प्रकाशित स्वर्णिम सपना कविता सङ्ग्रहबाट