नेपाली हास्यव्यङ्ग्य अनलाइन पत्रिका

काशीनाथ मिश्रित :

यता फुत्त गर्दै उता फुत्त गर्दै
दही गुग्धका पात्र चाट्दै चहार्दै
घिच्यो मासु त्यो थाल घोप्ट्याइहाल्यो !
कताबाट आएछ ढाडे बिरालो !!

बडो टिठलाग्दो बनी म्याउँ गर्छ
दयाले मुसारे नि झ्वाम्मै चिथोर्छ
सफा देखियोस् बाह्य भित्री छ कालो !
कहाँ साधु होस् दुष्ट ढाडे बिरालो ।

मुसा कत्ति मार्दैन चोरेर खान्छ
लघारे बिरालीतिरै मात्र जान्छ!
कठै! छाउरा ताँत गाडेर खायो
असत्तीअसाध्यै छ ढाडे बिरालो ।

मुसा मार्न खोज्दैन मार्योल परेवा
कता जान्छ को को भनी गर्छ चेवा
अगेनो ढुकी खोस्रने कुर्छ पालो
खरानी उडाएर ढाडे बिरालो ।

भकारी छ फोहोर टट्टी गरेर!
भताभुङ्ग भो धान जम्मै छरेर
कहिल्यै खुलै छोड्न पाइन्न डालो
सबै अन्न खोस्रन्छ ढाडे बिरालो ।

छुचोमा छुचो यो छ बाँडेर खान्न
विनास्वार्थ आफू कसैसामु जान्न
भलो गर्न चाहन्न कैल्यै कसैको
सुधारेर सुध्रन्न ढाडे बिरालो ।

घसी बोल्छ चिल्लो गरी म्याउँ म्याउँ
छ चिन्ता कसोरी तँलाई धपाउँ
सुरक्षार्थ कुत्ता भए पो खटिन्थ्यो !!
कुनै काम लाग्दैन ढाडे बिरालो ।

०००
२०८२ वैशाख ३१ गते
फोक्सिङ, गुल्मी