नेपाली हास्यव्यङ्ग्य अनलाइन पत्रिका

खगेन्द्र नेउपाने :

हराए लौ हली गोरु ट्याक्टरै भो घरघरै
खेती खर्च ठूलो लाग्छ सकिन्न धान्न हे बरै
यसरी कसरी चल्छ किसानी जिन्दगी पनि
सोच्दैन राज्यले लौ न दुख पायौ कठै ! भनि ।

बिकेन चैतको धान भाउ छैन कतै पनि
लैजाउ लैजाउ भन्दा साहु मान्दैन तैपनि
सडेर जानेभो अन्न पानी पर्छ घरीघरी
लगानी लागेको खर्च उठाउनु कसोगरी ।

धानको भाउ ओर्लेर भुस चर्को भयो बरु
राजनीति कति मिठो खेती झर्को भयो बरु
कुहिन्छ गाउँको अन्न तरकारी कृषकको
बिदेशी अन्नले टन्न शहरी पेट भर्ती भो ।

यो चैते भनिने बस्तु पिरहा भो यो देशमा
नेता राजनीति जस्तै भ्रष्ट व्यापार भेषमा
मञ्च माइकमा जस्तो सञ्च हुन्न कतै पनि
सहन्छ बिचरा खेती गर्ने किसान तैपनि !

०००
गाैरादह, झापा