नेपाली हास्यव्यङ्ग्य अनलाइन पत्रिका

कलानिधि दाहाल :

खोलेर झ्याल बाहिर हेरें झम्झम झरी छन्
स्वर्गको माथि आकाशबाट ओर्लेका परी छन् !
जलका थोपा सुन्दरी स्युँधा वहेर झरेका
पातमा परी दुबोमा झरी टल्पल रहेका !!

सिञ्चेर धरा अपरम्परा गर्भिणी बनेर
हरिया पात पिपिरा हल्हल सन्तान चुनेर !
हलक्क हल्की ढलक्क ढल्की लच्केकी सुन्दरी
उर्वरा बन्दै उर्वरमाथि झप्केकी चाँचरी !!

बलेको आगो निभेको गर्मी कम्लाको आकाश
जलका मुनि जल नै जोती निस्केको प्रकाश !
प्रमोद मिठो उन्मत्त आफैँ उन्माद छरेर
सृष्टिका पत्र छोपेर खुल्दै रहस्य भरेर !!

गम्केको मन बसेको तन नाँचेको मयूर
डाँफेको फट्फट् मण्डूक कुवा कहाँ छ सुदूर !
सौन्दर्य भर्ने पहाड उता कम्मर लच्काई
इन्द्रेणी रङ पटुकी ढङ क्या मजा मच्काई !!

झरीलाई मात्र झरीको रूप नदेऊ मानिस
खण्डमा खण्ड अखण्ड छ यो भित्रको आशिष !
किरण वक्ष सागर बोकी कपर्छन् गरेर
अजीव शुध्दि करणबाट बादलु ओढेर !!

बादलु घुम्टो भित्रको जल जलझैँ झरेर
धराकी मल भराकै माथि सौन्दर्य छरेर !
वसुधा सारा हरियो पारी वसुधा छिरेर
सागर रित्ती सागरै भर्ने घुम्फिर गरेर !!

अजीव यात्रा झरीको हेरौँ मानिस उही हो
अध्यात्म यात्रा अचम्म चक्का घुमेको उही हो !
रौँचिरा दर्शन छिरेर हेरौँ ब्रह्माण्ड उही हो
कल्पना घुमी कविता सिर्जूँ सिर्जना उही हो !!

…..कम्लाको आकाश सिर्जना झरी समग्र यही हो !!!

०००
कलेकुटी, काठमाडाैं