नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
कसैलाई जोख्न अथवा तौलिन जानेको भए
शिकारीको भाग बिलोझैं बाँडिन जानेको भए
तिम्रोभन्दा माथि नै हुन्थ्यो पक्कै मेरो हैसियत
वस्तु सरह लिलाम हुन या बेचिन जानेको भए ।

२.
यस्तो बीभत्स कि युद्धले चपाएको शहर जस्तै
डढेलोले डढाएको सुख्खा पराल या खर जस्तै
अनिश्चित छ हाम्रो सम्बन्धको परिभाषा अचेल
अन्तरिक्षमा स्वरूप बदल्ने बादलको घर जस्तै ।

३.
सबै बिक्छ बजारमा कछ्छी बिक्छ भोटो बिक्छ
कमिसनको कमाल हेर्नुस् सद्देभन्दा खोटो बिक्छ
नपत्याए हजुरले पनि प्रयोग गरेर हेर्नुस् एकपटक
विज्ञापनको दुनियाँमा मुस्कान बिक्छ फोटो बिक्छ ।

४.
उस्तै रहन्छ धरातल माटो उठाए या पोखिए पनि
बदलिन्न आयाम सागरको खोला नदी थपिए पनि
मरिचझैँ पिरै पिरले चाउरिएर मात्रै बस्नुहुन्छ किन ?
हुने कुरा भएरै छोड्छ चिन्ता लिए पनि नलिए पनि ।

०००
भैरहवा