डा. गोविन्दराज भट्टराईएक टपरी मेरा इच्छाहरू
टपरीभित्र लुकाइराखेको अँध्यारोमा घामले नदेख्ने टोड्कामा पुरानो टपरीभित्र प्रभु यति एक टपरी इच्छाहरू अनादि कालदेखिका मलाई सुकाउन दिन्छौ कि ? एकै घाम तिम्रा प्राचीन आँगनमा ।
डा. गाेविन्दराज भट्टराई :
यति एक टपरी इच्छाहरू
एकैछिन
सुकाउन दिन्छौ कि प्रभु
यो तिम्रो आँगनमा
एकै टपरी यी पुराना इच्छाले
तिम्रो आँगन कति पो ढाक्छ र
हे प्रभु !
अनादि कालदेखि
लुकाइरहेको यो बीउ
इच्छाहरूको
मासिने हो कि
यतिबेला
म बिघ्नै डराइरहेको छु
धेरै छैन,
अलिकति आकाङ्क्षा छन्
एकै मुठी स्वार्थहरू
दुई अन्जुली लोभ होला
त्यस्तै एकएक माना
द्वेष-ईर्ष्या
र
अरू सबै अकर्मण्यताको
बीउ राखेको छु
त्यसैमा मूर्खता मिसाएर
एउटा सानो कोसा पनि
मृत्युमारा
म चाहन्छु
यो मृत्युमाराको
सानो कणतुल्य
बीज रोपेर एउटा
आँगनमा
बोट पनि उमार्न सकौं
मेरो बगानमा
हजारौं वर्ष भो
एउटा टालोमा
बाँधेर
टपरीभित्र
लुकाइराखेको
अँध्यारोमा
घामले नदेख्ने टोड्कामा
पुरानो टपरीभित्र
प्रभु
यति एक टपरी इच्छाहरू
अनादि कालदेखिका
मलाई
सुकाउन दिन्छौ कि ?
एकै घाम
तिम्रा प्राचीन आँगनमा ।
०००
३० वैशाख २०६४
एक कल्प (२०७१)
गजब लाग्यो।हांसो त भितृ भाग हो तर व्यङ्ग्यभित्र झाट्ने काम पनि भए झैं लाग्यो सर!