उत्तम विचारघुसतन्त्रको जरो
घरमा घुसको चर्चा चलेमा बन्द होस् अब विनाघुसले चाड मान्नुमा लाग्छ गौरव ।। भ्रष्टका पछि लागेर हिँड्नु बेकार हो जुनी भन्दछिन् आज आएर श्रीमती धन्य छिन् उनी ।।
उत्तम विचार :
खानामा घुसको स्वाद भुलूँ म कसरी भन
ठान्दछ्यौ घुस खाएमा बन्छ सार्थक जीवन ।।
छिमेकी चढ्दछन् गाडी फेरिफेरी भनिन् अति
त्यसैले घुस खाएर खुसी राख्दछु श्रीमती ।।
महँगा गहना लाई होटेल धाउँछिन् उनी
यस्तै गरिगरी ठान्छिन् बिताउँला जुनी जुनी ।
खराबी कसको भन्नू बेला आएछ दुच्छर
नखाई घुस चल्दैन सहजै अबको घर ।।
कर्मचारी सदाचारी बनून् भन्दछ राज्यले
भ्रष्टाचारी भए ज्यादा सारा सम्यन्त्र नै ढले ।।
सुब्बाको घर देखाई गुनासो पोख्दछिन् उनी
सदाचारी भए मेरा श्रीमान् असाध्य बैगुनी ।।
सबैका श्रीमती यस्ता हुन्नन् अवश्य मान्दछु
घुस खानु महापाप हो पोल्छ भोलि जान्दछु ।।
घरमा घुसको चर्चा चलेमा बन्द होस् अब
विनाघुसले चाड मान्नुमा लाग्छ गौरव ।।
भ्रष्टका पछि लागेर हिँड्नु बेकार हो जुनी
भन्दछिन् आज आएर श्रीमती धन्य छिन् उनी ।।
चुसेर देशको रक्त अघाउन्नँ म सर्वदा
सादा जीवन बाँच्नेछु विचार उच्च होस् सदा ।।
०००
काठमाडाैं
हार्दिक आभार ।