नेपाली हास्यव्यङ्ग्य अनलाइन पत्रिका

रमेश खकुरेल :

प्राचीनपन्थी मति धारणाका
लोभी र पापी अति दुष्ट आँखा
खोस्ने र खाने पथका चनाखा
साँढेहरूका कति सुन्नु भाका ।।

मौका परे वाहन बन्न जान्छन्
स्वामी कसैको जिउ भार तान्छन्
निर्धा कुनै सामु परे पछार्छन्
खाना जहाँ मिल्दछ गै लतार्छन् ।।

होक्काँ कडा जोर छ मै हुँ भन्ने
अर्को तँ को हो र म पो हुँ भन्ने
छ एक बाच्छी म हुँ योग्य भन्छन्
परन्तु केही न त गर्न सक्छन् ।।

यौटा जुवा तान्न भनी जुटेका
नथ्थी छिनाई छलले छुटेका
यी गोरुले खेत न जोत्न सक्छन्
तानेर गाडा न त लान सक्छन् ।।

यो गोरुजात्रा कति वेर हेर्नु
के लेखिराख्तै कति फेर केर्नु
डण्डा बजाएर दुवै भगाऔं
अर्का भला गोरु लिई लगाऔं ।।

०००
कमलपाेखरी, काठमाडाैं