नेपाली हास्यव्यङ्ग्य अनलाइन पत्रिका

रमेश समर्थन :

“प्रधानमन्त्रीज्यू ! हामीले आपसमा न हानाहान गराैँ, न तानातान गराैं । न आत्मालाेचना, न पश्चात्ताप गराैँ । केवल परिस्थितिकाे आँकलन गराैँ र वैधानिक लुटकाे मार्ग प्रशस्त गराैँ ।”

प्रधानमन्त्रीकाे याे सम्बाेधनपछि मन्त्रिपरिषद् का सम्पूर्ण सदस्यहरूले परररररर ताली बजाए । प्रधानमन्त्रीले भने, ” तातै खाम् जल्दै मरम् भनेझैं तपाईंहरूकाे हतार म बुझ्दछु । हतार गर्दा चाेक्टा खान गएकी बूढी झाेलमा डुबेर मरी भनेझैं हुन्छ । त्यसैले हतार नगराैं ।”
“प्रधानमन्त्रीज्यू, तपाईं आफ्ना उखान टुक्का जनतालाई झुक्याउनका लागि सञ्चित राख्नुस् । पहिले भन्नुस् तपाईंसित त्यस्ताे के याेजना छ ?”

प्रधानमन्त्रीले भने, ” मेरा उखान र हाम्राे सुविधा उस्तै हाे । न कहिल्यै कम हुन्छ न सकिन्छ । जनतालाई त जति बाँडे पनि पुग्छ । सुनेरै अघाउनेले याे खान्नन् बरु उडाइदिन्छन् र जनताले उडाएकाे उखान र भक्तले उडाएकाे परेवा फर्केर त्यहीँ आउँछन् र पटक पटक उडाउन पाइन्छ ।”

“तपाईं फेरि उखानकै बखानमा लाग्नुभयाे । हामी के जाेखाना हेरेर बसाैं ? अब समय नै कति छ र ? बयासीका आठ र तिरासीका बार गरी जुम्मा जुम्मा आठ भनेझैं जम्माजम्मी बीस महिना मात्रै छ । ८४ लागेपछि त फेरि मुकुन्डाे भिरेर गाईजात्रा देखाउनुपर्छ । त्यसैले त्यसअघि नै केकति लुट्न सकिन्छ त्याे भन्नुस् ।”

“मान्छेले केजाति गर्न नपाउँदै केजाति हाे गरिएकाे वस्तु ज्युनार गर्न मान्छेकाे केजातिमा हाे मुख जाेर्न आएझैँ भएकाे छ । ल, सुन्नुस् ! एक, अबदेखि कसैले कम्पाउन्ड नाघेर, झ्यालबाट निस्केर भाग्नुपर्ने छैन । घरमा श्रीमती भए पनि बाहिरबाट सन्तान जन्माउन वा सन्तान जन्माउने बनाएर विवाह गर्न पाइने कानुन ल्याउँदै छाैँ । यसबाट यहाँहरूले जतातिर थुतुनाे झाेंसे पनि हुन्छ । दुई, हामीलगायत सवै माननीयहरूलाई संसद् मा पाँचतारे हाेटलकाे जस्ताे खाना, खाजा उपलब्ध गराइने छ । यसबाट सांसदहरूकाे संसद् मा उपस्थिति बढ्ने आशा लिएकाे छु । जनताले नुनकाे ढिकाे नपाए पनि तिनै जनताले नाेट र भाेट दिएर जिताएका हामीले उनीहरूलाई अझ बढी चाेट दिएर परम कृतघ्न बन्न पाइने अवसर पाउनुहुने छ । र, तेस्राे हाे हामी सवैले आफ्नाे तलब आफै ताेक्न पाउने भयाैँ । कतै नभएकाे जात्रा हाँडीगाउँमा भन्छन् तर यसले हाँडीगाउँकाे राष्ट्रिय सम्मान बढाएकाे छ । देशे मरु झ्या: त सुन्नुभएकाे थियाे , अब संसारे मरु कानुन देख्नु, भाेग्नु र घरीघरी त्यसकाे परमानन्द लिन पाउने सुविधा यसै सरकारले उपलब्ध गराउने भएकाे छ ।”

“सांसदहरूले मान्लान् त ?” एउटा उपबुज्रुक मन्त्री प्याच्च बाेल्याे ।

“रातभरि रामायण सुन्याे, सीता कसकी जाेई ! याे विधेयक हाे र सांसदले मान्नुपर्ने ? याे त मन्त्रिपरिषद् काे निर्णय हाे ।” प्रधानमन्त्रीले भनेपछि सबैले ताली बजाए ।

०००
रूपन्देही