नेपाली हास्यव्यङ्ग्य अनलाइन पत्रिका

उत्तम विचार :

बढ्दै गयो बेथिति राष्ट्रमा अति
मानौं यही कारणले भयो क्षति ।
खेल्ने कसैको किन बन्नु यो थलो
दुर्गा भवानी गर देशको भलो।।१।

बाटो बिराई घरको मुली हिँड्यो
दायित्व के हो उसको भुली हिँड्यो ।
कोक्याउने फ्याँक्नुछ छुद्र कर्कलो
दुर्गा भवानी गर देशको भलो।।२।

जागे युवा देश उठाउँछौँ भनी
आशिष् दिनुहोस् विजयी हुनू भनी ।
फेर्ने अवस्था अभियान जो चल्यो
दुर्गा भवानी गर देशको भलो।।३।

देऊ सुरक्षा मन छैन यो थिर
धाई रहेछौँ दिनरात मन्दिर ।
उठ्ला भन्यो साख उठेन झन् ढल्यो
दुर्गा भवानी गर देशको भलो।।४।

गर्छौँ पुकारा सुन मातृशक्ति हे
लाएर यो चित्त मुमा सभक्तिले ।
बन्दैन यो राष्ट्र जुट्यौँ भने ढिलो
दुर्गा भवानी गर देशको भलो।।५।

०००
काठमाडाैं