नेपाली हास्यव्यङ्ग्य अनलाइन पत्रिका

बिन्दु दहाल मुकदर्शक :

कतै चल्छ नारा उठौँ सर्वहारा
त्यहीँ देख्छु कैयौँ छुसी कर्महारा
अझै बढ्न थाल्यो यहाँ लाजनीति
नथाम्ने भयो देशले राजनीति ।१

यहीँ अग्नि झोस्छन् लु खा देश भन्दै
समाएर कुर्सी बुढो बस्छ कन्दै
युवा पारि लाग्ने सधैँ बढ्छ रीति
नथाम्ने भयो देशले राजनीति ।२

यहीँ चल्छ दादागिरी लाजमर्दो
सधैँ देशको हाल देखिन्छ झर्दो
लिए खोकिलामा वृथा बाजनीति
नथाम्ने भयो देशले राजनीति ।३

इमानीहरू भोग्दछन् जेलखाना
फटाहाहरू पाउँछन् हा ! रमाना
बढ्यो एकतामा झुटा भाँजनीति
नथाम्ने भयो देशले राजनीति ।४

यहीँ चोरडाँकाहरू भोट जित्छन्
कठै बुद्धिजीवीहरू पाउ मिच्छन्
हरायो पुरानो मिली बाँचनीति
नथाम्ने भयो देशले राजनीति ।५

०००
दमक, झापा