नेपाली हास्यव्यङ्ग्य अनलाइन पत्रिका

खगेन्द्र नेउपाने :

असीवर्षे बा
अझै गाउँमा कुँडाे पकाएर
गाई पालिरहनु भएकाे छ
गाेबर फालिरहनु भएकाे छ
खेतमा ताेरी छर्दै हुनुहुन्छ
बारीमा काम गर्दै हुनुहुन्छ
तिमी चाहिँ शहरमा
बूढाकाे काम छैन भन्छाै रे
हाेटलकाे टेबुलमा
दुईचार लाउके भेला पारेर
कुनाकाे एष्ट्रेमा
शिखर आइसकाे खरानी झारेर
बूढाहरु फाल्नुपर्छ
पुरानु सत्ता ढाल्नुपर्छ
भन्दैछाै रे ।

खै के भयाै तिमी ?
खै कहाँ गयाै तिमी ?
कुन आवेशमा चल्दैछाै
कुन ठुटाकाे आगाेसँगै जल्दैछाै
यता बा मकैकाे ढाेड सल्काएर
पिराे अनुहारसँगै जीवन झेल्दैछन्
तिमीलाई एक मानु घ्यू र
एक मुठ्ठी मस्याैरा ठेल्दैछन्
उता तिमी प्राैढ मनहरुप्रति
अलिकति नसाेचेर
अलिकति घाेचेर
अलिकति खिज्याएर
अलिकति अपमानकाे गीत गाएर
अब पाइला चाल्नुपर्छ
भन्दैछाै रे पुरानाे सत्ता ढाल्नुपर्छ  ।

सक्छाै भने आऊ
विहानै झिसमिसेमा खाेले पकाऊ
थाेत्रै पेन्ट लगाऊ
जाडाेले खुट्टा कमाऊ
हिजाे बेलुका राखेकाे
एक मुठ्ठा घाँस हाल
थाराे कुकुर हाेइन लैनाे भैंसी पाल
बाबुकाे बिरासत सम्हाल
अनि मात्रै बूढाकाे सत्ता ढाल ।

०००
गाैरदह, झापा