गायत्री परिरोशनीघण्टी बजेपछि !
अब हाम्रा पौरखी रहर जाँगर अल्छिको फिँजारेर, आकाशबाट विकास बर्सेको डोकोमा थाप्नुछ । शुख, शान्ति र समृद्धिको सपना सानो पलाष्टिकको पोकोमा राख्नुछ ॥
गायत्री लम्साल :
स्कुल शुरु हँदा घण्टी बजाइन्छ
स्कुल छुट्टी हुँदा पनि घण्टी बजाइन्छ ।
घण्टी घण्टी नै हो,
जुन चोर बाख्राको घाँटीमा झुण्ड्याइन्छ
अनि पूजाकोठीमा समेत बजाइन्छ ॥
घण्टीको आवाज उस्तै हुन्छ
तर,
चोर समाउन पनि घण्टी बजाइन्छ
अनि चोर छुटाउन पनि घण्टी बजाइन्छ ।
हामी सबै घण्टी प्रेमी
हामी सबै घण्टीका भक्त,
हाम्रा पुस्तौँ अगाडिका पुर्खाले
मस्तले घण्टी बजाउनुभयो,
भक्तजनहरुलाई मख्ख पारेर,
कोतपर्व र भण्डारखाल पर्व जस्ता
अनेकौँ पर्वमा सजाउनुभयो ॥
हाम्रा हजुरबाबाहरु समेत
सबै घण्टी प्रेमी
घण्टीको मधुरधुनमा सबैलाई लट्ठ्याएर
अन्याय र अत्याचारको
अमृत भोजनले,
निमुखा, असहाय र दीनदुखीलाई
मस्तले मार्नुभयो,
अझै पौरख फैलाउन,
घण्टीको आकार, प्रकार र साइज फेरेर
नयाँ ठाउँमा बसाइँ सार्नुभयो ॥
हामी सबै कमालका घण्टीप्रेमीहरु
आफै घण्टी भएर किन बज्ने ?
कहिल्यै प्रयास नै गरिएन
जसको, जहाँबाट, जुन समयमा, जस्तो
घण्टी बजाए तापनि
फुरुक्क पर्दै, उतै दौडिरह्यौँ ॥
आफुले आफ्नै सजिव अस्तित्व बिर्सेर
निर्जीव घण्टीको पछि लागिरह्याैँ ।
अब हाम्रा पौरखी रहर
जाँगर अल्छिको फिँजारेर,
आकाशबाट विकास बर्सेको
डोकोमा थाप्नुछ ।
शुख, शान्ति र समृद्धिको सपना
सानो पलाष्टिकको पोकोमा राख्नुछ ॥
०००
स्याङ्जा
घन्टी प्रेम पुस्तैनी बपौती,व्यङ्ग्य सशक्त